ಜುಬೈಲ್ (ಸೌದಿ ಅರೇಬಿಯಾ): ಮೂಳೂರಿನ ಅಲ್-ಖಮರ್ ವೆಲ್ಫೇರ್ ಅಸೋಸಿಯೇಷನ್ (AQWA KSA) ವತಿಯಿಂದ ಆಯೋಜಿಸಲಾದ ‘AQWA 40-ಯಾರ್ಡ್ ಕ್ರಿಕೆಟ್ ಟೂರ್ನಮೆಂಟ್’ ಅಲ್ ಫಲಾಹ್ ಕ್ರಿಕೆಟ್ ಮೈದಾನದಲ್ಲಿ ಯಶಸ್ವಿಯಾಗಿ ನಡೆಯಿತು.
AQWA ಸಂಸ್ಥೆಯ ಸ್ಥಾಪಕ ಸದಸ್ಯರಾದ ಅಬ್ದುಲ್ ಕರೀಮ್ ಅವರು ಪಂದ್ಯಾವಳಿಯನ್ನು ಉದ್ಘಾಟಿಸಿದರು. ಕ್ರೀಡಾ ಮನೋಭಾವ, ಒಗ್ಗಟ್ಟು ಮತ್ತು ಸ್ನೇಹಸೌಹಾರ್ದದ ಸಂದೇಶ ಸಾರಿದ ಈ ಪಂದ್ಯಾವಳಿಯಲ್ಲಿ ಹಲವು ತಂಡಗಳು ಉತ್ಸಾಹದಿಂದ ಪಾಲ್ಗೊಂಡು ರೋಚಕ ಹಣಾಹಣಿಗೆ ಸಾಕ್ಷಿಯಾದವು.
ಅಂತಿಮ ಪಂದ್ಯದಲ್ಲಿ ‘ದಿಲ್‌ಪಸಂದ್ ಮೂಳೂರು’ ತಂಡವು ಅದ್ಭುತ ಪ್ರದರ್ಶನ ನೀಡಿ ಚಾಂಪಿಯನ್ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡರೆ, ‘HMC ಅದಮಾರ್’ ತಂಡ ರನ್ನರ್‌ಅಪ್ ಸ್ಥಾನಕ್ಕೆ ತೃಪ್ತಿಪಟ್ಟಿತು. ವಿಜೇತ ತಂಡಗಳ ಸಹಿತ ಪಂದ್ಯಾವಳಿಯಲ್ಲಿ ಭಾಗವಹಿಸಿದ ಎಲ್ಲಾ ತಂಡಗಳಿಗೂ AQWA KSA ಅಭಿನಂದನೆ ಸಲ್ಲಿಸಿದೆ.
ಪಂದ್ಯಾವಳಿಯ ಯಶಸ್ಸಿಗೆ AMCC, Amplitude, Middle World ಮತ್ತು Hawel ಸಂಸ್ಥೆಗಳು ಪ್ರಾಯೋಜಕರಾಗಿ ಸಹಕಾರ ನೀಡಿದವು. ಸಂಘಟನಾ ಕಾರ್ಯದಲ್ಲಿ ಅಸೀಮ್ ಇಸ್ಮಾಯಿಲ್ ಮತ್ತು ಅವರ ತಂಡದ ಪರಿಶ್ರಮವನ್ನು AQWA ವಿಶೇಷವಾಗಿ ಶ್ಲಾಘಿಸಿದೆ.
ಇದರೊಂದಿಗೆ ತೆರೆಮರೆಯಲ್ಲಿ ಶ್ರಮಿಸಿದ ಅಬ್ದುಲ್ ಕರೀಮ್, ಮುಹಮ್ಮದ್ ಇಸ್ಮಾಯಿಲ್, ಹಾರಿಸ್ ಯೂಸುಫ್, ಮೊಹಮ್ಮದ್ ಅಲಿ, ಅಬ್ದುಲ್ ಖಾಲಿಕ್, ಅಬ್ದುಲ್ ಮುಬೀನ್, ಮುಹಮ್ಮದ್ ಸಿದ್ದೀಕ್, ಮನ್ಸೂರ್ ಸೇರಿದಂತೆ ಸಂಘಟನೆಯ ಎಲ್ಲಾ ಸದಸ್ಯರು ಹಾಗೂ ಸ್ವಯಂಸೇವಕರ ಸೇವೆಯನ್ನು ಸಮಿತಿ ಕೃತಜ್ಞತೆಯಿಂದ ಸ್ಮರಿಸಿದೆ.
ಪಂದ್ಯಾವಳಿಯಲ್ಲಿ ನಿಷ್ಪಕ್ಷಪಾತವಾಗಿ ತೀರ್ಪು ನೀಡಿದ ಅಂಪೈರ್‌ಗಳು ಹಾಗೂ ಸ್ಕೋರರ್‌ಗಳಿಗೂ ಆಯೋಜಕರು ಧನ್ಯವಾದ ಅರ್ಪಿಸಿದ್ದಾರೆ.
