ಸಿಡ್ನಿ: ಸಾರ್ವಜನಿಕ ಆರೋಗ್ಯ ಪ್ರಯೋಗಾಲಯದಿಂದ ನೂರಾರು ವೈರಸ್ ಮಾದರಿಗಳು ಕಾಣೆಯಾದ ನಂತರ ಆಸ್ಟ್ರೇಲಿಯಾದ ಕ್ವೀನ್ಸ್‌ಲ್ಯಾಂಡ್‌ನ ಅಧಿಕಾರಿಗಳು, “ಇದೊಂದು ಐತಿಹಾಸಿಕ ರಕ್ಷಣಾ ಉಲ್ಲಂಘನೆ” ಎಂದು ಹೇಳಿಕೆ ನೀಡಿದ್ದು, ಘಟನೆಯನ್ನು ದೃಢಪಡಿಸಿದ್ದಾರೆ ಎಂದು ವರದಿಗಳು ತಿಳಿಸಿವೆ. ಘಟನೆಯ ಬಗ್ಗೆ ತನಿಖೆಯನ್ನು ಪ್ರಾರಂಭಿಸಲು ಕ್ವೀನ್ಸ್‌ಲ್ಯಾಂಡ್ ಹೆಲ್ತ್‌ಗೆ ನಿರ್ದೇಶನ ನೀಡಲಾಗಿದೆ, ಇದನ್ನು ಸುರಕ್ಷತಾ ಕ್ರಮಗಳಲ್ಲಿ ಸ್ವೀಕಾರಾರ್ಹವಲ್ಲದ ಗಂಭೀರ ಲೋಪ ಎಂದು ವಿವರಿಸಲಾಗಿದೆ.
ಸೋಮವಾರದಂದು ಕ್ವೀನ್ಸ್‌ಲ್ಯಾಂಡ್ ಸರ್ಕಾರದ ಅಧಿಕೃತ ಹೇಳಿಕೆಯ ಪ್ರಕಾರ, ಹೆಂಡ್ರಾ ವೈರಸ್, ಲೈಸಾವೈರಸ್ ಮತ್ತು ಹ್ಯಾಂಟವೈರಸ್ ಸೇರಿದಂತೆ ಅಪಾಯಕಾರಿ ವೈರಸ್‌ಗಳನ್ನು ಒಳಗೊಂಡಿರುವ 323 ಬಾಟಲುಗಳು ಆಗಸ್ಟ್ 2023 ರಲ್ಲಿ ಕ್ವೀನ್ಸ್‌ಲ್ಯಾಂಡ್ ಸಾರ್ವಜನಿಕ ಆರೋಗ್ಯ ವೈರಾಲಜಿ ಪ್ರಯೋಗಾಲಯದಿಂದ ಕಾಣೆಯಾಗಿದೆ.
ಹೆಂಡ್ರಾ ವೈರಸ್, ಆಸ್ಟ್ರೇಲಿಯಾದಲ್ಲಿ ಮಾತ್ರ ಕಂಡುಬರುತ್ತದೆ, ಇದು ಪ್ರಾಣಿಗಳಿಂದ ಮನುಷ್ಯರಿಗೆ ಹರಡುವ ಝೂನೋಟಿಕ್ ವೈರಸ್ ಆಗಿದೆ. ಲೈಸವೈರಸ್ ಎಂಬುದು ರೇಬೀಸ್ ಅನ್ನು ಒಳಗೊಂಡಿರುವ ವೈರಸ್‌ಗಳ ಕುಟುಂಬವಾಗಿದ್ದು, ಸರಿಯಾದ ವೈದ್ಯಕೀಯ ಮಧ್ಯಸ್ಥಿಕೆ ಇಲ್ಲದೆ ಮಾರಕವಾಗಬಹುದು. ಅಂತೆಯೇ, ಯುಎಸ್ ಸೆಂಟರ್ಸ್ ಫಾರ್ ಡಿಸೀಸ್ ಕಂಟ್ರೋಲ್ ಅಂಡ್ ಪ್ರಿವೆನ್ಷನ್ (ಸಿಡಿಸಿ) ಗಮನಿಸಿದಂತೆ, ಹ್ಯಾಂಟವೈರಸ್ ಗಂಭೀರ ಅನಾರೋಗ್ಯ ಮತ್ತು ಸಾವಿಗೆ ಕಾರಣವಾಗಬಹುದು.
ಕಾಣೆಯಾದ ಮಾದರಿಗಳನ್ನು ಕಳವು ಮಾಡಲಾಗಿದೆಯೇ, ನಾಶಪಡಿಸಲಾಗಿದೆಯೇ ಅಥವಾ ಕಳೆದುಹೋಗಿದೆಯೇ ಎಂಬುದು ಸ್ಪಷ್ಟವಾಗಿಲ್ಲ. ಈ ಸಮಯದಲ್ಲಿ “ಜನರಿಗೆ ಅಪಾಯದ ಯಾವುದೇ ಖಚಿತ ಪುರಾವೆಗಳಿಲ್ಲ” ಎಂದು ಸರ್ಕಾರದ ಹೇಳಿಕೆಯು ಸಾರ್ವಜನಿಕರಿಗೆ ಕೊಂಚ ಮಟ್ಟಿಗೆ ಭರವಸೆ ನೀಡಿದೆ.
