ದುಬೈ: 2025ರಿಂದ ಖಾಸಗಿ ವಲಯದ ಉದ್ಯೋಗಿಗಳು, ಗೃಹ ಕಾರ್ಮಿಕರಿಗೆ ಆರೋಗ್ಯ ವಿಮಾ ಯೋಜನೆಯನ್ನು ಯುಎಇಯಲ್ಲಿ ಕಡ್ಡಾಯಗೊಳಿಸಲಾಗಿದೆ.
ಈ ಹಿನ್ನೆಲೆಯಲ್ಲಿ ಯುಎಇಯ ಮಾನವ ಸಂಪನ್ಮೂಲ ಮತ್ತು ವಾಪಸಾತಿ ಸಚಿವಾಲಯ (MoHRE) ಇತ್ತೀಚೆಗೆ ಖಾಸಗಿ ವಲಯದ ಉದ್ಯೋಗಿಗಳು, ಗೃಹ ಕಾರ್ಮಿಕರು ಮತ್ತು ಯುಎಇಯಾದ್ಯಂತ ವಿಮೆ ಮಾಡದವರಿಗೆ ಮೂಲಭೂತ ಆರೋಗ್ಯ ವಿಮಾ ಪ್ಯಾಕೇಜ್ ಅನ್ನು ಪ್ರಾರಂಭಿಸಿದೆ. ಇದು ಯುಎಇ ಕ್ಯಾಬಿನೆಟ್ ಅನುಮೋದಿಸಿದ ಆರೋಗ್ಯ ವಿಮಾ ಯೋಜನೆಯ ಭಾಗವಾಗಿದೆ.
ಜನವರಿ 1ರಿಂದ ಶಾರ್ಜಾ, ಅಜ್ಮಾನ್, ಉಮ್ ಅಲ್ ಕುವೈನ್, ರಾಸ್ ಅಲ್ ಖೈಮಾ ಮತ್ತು ಫುಜೈರಾ ನಗರಗಳಲ್ಲಿನ ಖಾಸಗಿ ಉದ್ಯೋಗದಾತರು ತಮ್ಮ ಉದ್ಯೋಗಿಗಳಿಗೆ ನಿವಾಸ ಪರವಾನಗಿಗಳನ್ನು ನೀಡುವ ಅಥವಾ ನವೀಕರಿಸುವ ವೇಳೆ ಆರೋಗ್ಯ ವಿಮಾ ಪಾಲಿಸಿಯನ್ನು ನೀಡುವುದನ್ನು ಕಡ್ಡಾಯಗೊಳಿಸಿದೆ.
ದುಬೈ ಮತ್ತು ಅಬುಧಾಬಿಯಲ್ಲಿ ಈಗಾಗಲೇ ಇದೇ ರೀತಿಯ ನೀತಿಗಳನ್ನು ಜಾರಿಗೆ ತರಲಾಗಿದೆ. ಖಾಸಗಿ ಕಂಪನಿಗಳು ತಮ್ಮ ನೌಕರರಿಗೆ ಆರೋಗ್ಯ ವಿಮಾ ಪಾಲಿಸಿಯನ್ನು ನೀಡುವುದನ್ನು ಈಗಾಗಲೇ ಕಡ್ಡಾಯಗೊಳಿಸಿದೆ.
ಜನವರಿ 1, 2024ರ ಮೊದಲು ಕೆಲಸದ ಪರವಾನಗಿಗಳನ್ನು ನೀಡಲಾದ ಉದ್ಯೋಗಿಗಳಿಗೆ ಆದೇಶವು ಅನ್ವಯಿಸುವುದಿಲ್ಲ, ಅದು ಮಾನ್ಯವಾಗಿರುತ್ತದೆ ಮತ್ತು ಅವರ ನಿವಾಸ ಪರವಾನಗಿಗಳನ್ನು ನವೀಕರಿಸುವ ಸಮಯ ಬಂದಾಗ ಮಾತ್ರ ಇದು ಕಡ್ಡಾಯವಾಗಿರುತ್ತದೆ.
ಪಾಲಿಸಿಯು ಎರಡು ವರ್ಷಗಳವರೆಗೆ ಮಾನ್ಯವಾಗಿರುತ್ತದೆ
ಮಾನವ ಸಂಪನ್ಮೂಲ ಸಚಿವಾಲಯದ ಆರೋಗ್ಯ ವಿಮಾ ಪಾಲಿಸಿಗೆ ವರ್ಷಕ್ಕೆ 320 ದಿರ್ಹಂ ವೆಚ್ಚವಾಗುತ್ತದೆ. ಇದು ಎರಡು ವರ್ಷಗಳವರೆಗೆ ಮಾನ್ಯವಾಗಿರುತ್ತದೆ. ಈ ಪಾಲಿಸಿಯ ಸದುಪಯೋಗವನ್ನು 1 ರಿಂದ 64 ವರ್ಷ ವಯಸ್ಸಿನ ವ್ಯಕ್ತಿಗಳು ಪಡೆಯಬಹುದಾಗಿದೆ. ಒಳರೋಗಿಗಳ ಆರೈಕೆ ಮತ್ತು ಹೊರರೋಗಿಗಳ ಆರೈಕೆಗಾಗಿ 20% ಸಹ-ಪಾವತಿಯೊಂದಿಗೆ ವೈದ್ಯಕೀಯ ವೆಚ್ಚಗಳನ್ನು ಒಳಗೊಂಡಿದೆ. ಈ ಪಾಲಿಸಿಯೂ ಏಳು ಆಸ್ಪತ್ರೆಗಳು, 46 ಚಿಕಿತ್ಸಾಲಯಗಳು ಮತ್ತು 45 ಔಷಧಾಲಯಗಳನ್ನು ಒಳಗೊಂಡಿದೆ. ಜನವರಿ 1, 2025 ರಿಂದ ಉದ್ಯೋಗದಾತರು ಹೊಸ ವಿಮಾ ಪ್ಯಾಕೇಜ್ ಅನ್ನು ದುಬೈ ಕೇರ್ ನೆಟ್‌ವರ್ಕ್ ಅಥವಾ ಇತರ ಅಧಿಕೃತ ವಿಮಾ ಕಂಪನಿಗಳ ಮೂಲಕ ಖರೀದಿಸಬಹುದು. ಕಾರ್ಮಿಕರ ಕುಟುಂಬದ ಅವಲಂಬಿತರು ಇದರ ಪ್ರಯೋಜನಗಳನ್ನು ಪಡೆಬಹುದಾಗಿದೆ.
