ಉದಯರವಿಯ ನಾಡು ಜಪಾನ್‌ನಲ್ಲಿ ಕನ್ನಡದ ಕಲರವ ಮೊಳಗಲು ವೇದಿಕೆ ಸಜ್ಜಾಗುತ್ತಿದೆ! ತಂತ್ರಜ್ಞಾನ, ಶಿಸ್ತು, ಸಂಸ್ಕೃತಿ ಹಾಗೂ ಸಂಪ್ರದಾಯಗಳಿಗೆ ಹೆಸರಾದ ಜಪಾನ್ ದೇಶದ ರಾಜಧಾನಿ ಟೋಕಿಯೊದಲ್ಲಿ ನವೆಂಬರ್ 22ರಂದು ವಿಶ್ವ ಕನ್ನಡಿಗರ ಮಹಾಸಂಗಮ ನಡೆಯಲಿದೆ.
ಉತ್ತರ ಅಮೇರಿಕದ ವಿಶ್ವ ಕನ್ನಡಿಗರ ಸಂಘಟನೆ ‘ನಾವಿಕ’ ಹಾಗೂ ಜಪಾನ್‌ನ ಟೋಕಿಯೊ ಕನ್ನಡ ಬಳಗ ಜಂಟಿಯಾಗಿ ಆಯೋಜಿಸಿರುವ ಎಂಟನೇ ನಾವಿಕೋತ್ಸವ, ಕನ್ನಡ ರಾಜ್ಯೋತ್ಸವ ಹಾಗೂ ಟೋಕಿಯೊ ಕನ್ನಡ ಬಳಗದ 25ನೇ ವಾರ್ಷಿಕೋತ್ಸವ ಒಂದೇ ವೇದಿಕೆಯಲ್ಲಿ ಮೇಳೈಸಲಿವೆ.
ಅಮೇರಿಕದಿಂದ ಸುಮಾರು ಮುನ್ನೂರು ಕನ್ನಡಿಗರು: ಡಾ. ಅನು ಭಟ್
ನಾವಿಕ ಸಂಸ್ಥೆಯ ಅಧ್ಯಕ್ಷೆ ಡಾ. ಅನು ಭಟ್ ಅವರು ಈ ಐತಿಹಾಸಿಕ ಸಮಾರಂಭದ ಬಗ್ಗೆ ಅಪಾರ ಸಂತಸ ವ್ಯಕ್ತಪಡಿಸಿದ್ದಾರೆ. ಅಮೇರಿಕದಿಂದ ಸುಮಾರು 300 ಕನ್ನಡಿಗರು ನಾವಿಕೋತ್ಸವದಲ್ಲಿ ಭಾಗವಹಿಸಲು ಜಪಾನ್‌ಗೆ ಆಗಮಿಸುವ ನಿರೀಕ್ಷೆಯಿದೆ. ಟೋಕಿಯೊ ಕನ್ನಡ ಬಳಗದೊಂದಿಗೆ ಈ ಮಹೋತ್ಸವವನ್ನು ಆಚರಿಸುತ್ತಿರುವುದು ನಾವಿಕ ಸಂಸ್ಥೆಗೆ ಹೆಮ್ಮೆಯ ವಿಷಯವಾಗಿದೆ ಎಂದು ಅವರು ತಿಳಿಸಿದ್ದಾರೆ.
ವಿಶ್ವದ ವಿವಿಧ ದೇಶಗಳಲ್ಲಿ ನೆಲೆಸಿರುವ ಕನ್ನಡಿಗರನ್ನು ‘ಕಿಜುನಾ’ ಎಂಬ ಬಾಂಧವ್ಯದ ಆಶಯದಡಿ ಒಂದೇ ವೇದಿಕೆಯಲ್ಲಿ ಒಗ್ಗೂಡಿಸುವ ಈ ಸಂಭ್ರಮದಲ್ಲಿ ಭಾಗವಹಿಸಲು ಎಲ್ಲ ಕನ್ನಡ ಕುಟುಂಬಗಳಿಗೂ ಅವರು ಆತ್ಮೀಯ ಆಹ್ವಾನ ನೀಡಿದ್ದಾರೆ.
ವಿಶ್ವ ಕನ್ನಡಿಗರ ಸ್ವಾಗತಕ್ಕೆ ಟೋಕಿಯೊ ಸಜ್ಜು!
ಟೋಕಿಯೊ ಕನ್ನಡ ಬಳಗದ ಮಾಧ್ಯಮ ಸಂಯೋಜಕ ಗಣೇಶ ಮೇಗೂರು ಅವರು ನಾವಿಕೋತ್ಸವದ ಸಿದ್ಧತೆಗಳ ಕುರಿತು ಸಂತಸ ವ್ಯಕ್ತಪಡಿಸಿದ್ದಾರೆ. ತಮ್ಮ ಬಳಗದ ಬೆಳ್ಳಿ ಹಬ್ಬವನ್ನು ನಾವಿಕ ಸಂಸ್ಥೆಯೊಂದಿಗೆ ಜಂಟಿಯಾಗಿ ಆಚರಿಸುತ್ತಿರುವುದು ಜಪಾನ್ ಕನ್ನಡಿಗರಿಗೆ ವಿಶೇಷ ಹೆಮ್ಮೆಯ ಸಂಗತಿಯಾಗಿದೆ ಎಂದು ತಿಳಿಸಿರುವ ಅವರು, ಅಮೇರಿಕ ಸೇರಿದಂತೆ ವಿಶ್ವದ ವಿವಿಧ ದೇಶಗಳಿಂದ ಆಗಮಿಸುವ ಕನ್ನಡಿಗರನ್ನು ಆತ್ಮೀಯವಾಗಿ ಸ್ವಾಗತಿಸಲು ಟೋಕಿಯೊ ಕನ್ನಡ ಬಳಗ ಉತ್ಸಾಹದಿಂದ ಸಜ್ಜಾಗುತ್ತಿದೆ ಎಂದು ಹೇಳಿದ್ದಾರೆ.
ಗಣ್ಯರು ಹಾಗೂ ಕಲಾವಿದರ ಸಮಾಗಮ
ಕರ್ನಾಟಕ ಸರ್ಕಾರದ ಅನಿವಾಸಿ ಭಾರತೀಯ ವೇದಿಕೆಯ ಉಪಾಧ್ಯಕ್ಷೆ ಡಾ. ಆರತಿ ಕೃಷ್ಣ ಅವರು ಈ ಸಮಾರಂಭದಲ್ಲಿ ಗೌರವ ಅತಿಥಿಯಾಗಿ ಭಾಗವಹಿಸಲಿದ್ದಾರೆ. ಕನ್ನಡ ಚಿತ್ರರಂಗದ ಹಿರಿಯ ನಟ ಡಾ. ಶ್ರೀನಾಥ್ ಹಾಗೂ ಅವರ ಪತ್ನಿ ಗೀತಾ ಶ್ರೀನಾಥ್ ವಿಶೇಷ ಅತಿಥಿಗಳಾಗಿ ಪಾಲ್ಗೊಳ್ಳಲಿದ್ದಾರೆ.
ಇದಲ್ಲದೆ, ಕರ್ನಾಟಕದ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್, ಕನ್ನಡ ಮತ್ತು ಸಂಸ್ಕೃತಿ ಸಚಿವ ಶಿವರಾಜ ತಂಗಡಗಿ, ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಸಚಿವ ಯು.ಟಿ. ಖಾದರ್, ಕನ್ನಡ ಸಾಹಿತ್ಯ ಪರಿಷತ್ತಿನ ಆಡಳಿತಾಧಿಕಾರಿ ಹಾಗೂ ಹಿರಿಯ ಐಎಎಸ್ ಅಧಿಕಾರಿ ಕೆ.ಎ. ದಯಾನಂದ ಮತ್ತು ಹಿರಿಯ ಪತ್ರಕರ್ತ ವಿಶ್ವೇಶ್ವರ ಭಟ್ ಸೇರಿದಂತೆ ಹಲವು ಗಣ್ಯರನ್ನು ಈ ಐತಿಹಾಸಿಕ ಸಮಾರಂಭಕ್ಕೆ ಆಹ್ವಾನಿಸಲಾಗಿದೆ.
ರಾಜಕೀಯ, ಸಾಹಿತ್ಯ, ಕಲೆ, ಸಂಸ್ಕೃತಿ ಹಾಗೂ ಮಾಧ್ಯಮ ಕ್ಷೇತ್ರಗಳ ಗಣ್ಯರ ಉಪಸ್ಥಿತಿಯ ನಿರೀಕ್ಷೆಯೊಂದಿಗೆ ಟೋಕಿಯೊದಲ್ಲಿ ನಡೆಯಲಿರುವ ಈ ವಿಶ್ವ ಕನ್ನಡಿಗರ ಸಮಾಗಮ ವಿಶೇಷ ಮಹತ್ವ ಪಡೆದುಕೊಂಡಿದೆ.
ಕಿಜುನಾ — ಗಡಿಗಳನ್ನು ಮೀರಿದ ಬಾಂಧವ್ಯ!
ಈ ಬಾರಿಯ ನಾವಿಕೋತ್ಸವಕ್ಕೆ ‘ಕಿಜುನಾ’ (KIZUNA – 絆) ಎಂಬ ಅರ್ಥಪೂರ್ಣ ಜಪಾನಿ ಹೆಸರನ್ನಿಡಲಾಗಿದೆ. ಜಪಾನಿ ಭಾಷೆಯಲ್ಲಿ ಕಿಜುನಾ ಎಂದರೆ ಬಾಂಧವ್ಯ, ಆತ್ಮೀಯ ಸಂಬಂಧ ಎಂದರ್ಥ.
ಸಾವಿರಾರು ಮೈಲುಗಳ ಅಂತರ, ಬೇರೆ ಬೇರೆ ದೇಶಗಳು, ವಿಭಿನ್ನ ಭಾಷೆಗಳು, ವಿಭಿನ್ನ ಸಂಸ್ಕೃತಿಗಳಿದ್ದರೂ ಕನ್ನಡಿಗರ ಹೃದಯಗಳನ್ನು ಬೆಸೆಯುವ ಸ್ನೇಹ ಮತ್ತು ಪ್ರೀತಿಗೆ ಇದಕ್ಕಿಂತ ಸೂಕ್ತವಾದ ಹೆಸರು ಇನ್ನೊಂದಿಲ್ಲ!
ಕನ್ನಡಿಗರು ಎಲ್ಲೇ ನೆಲೆಸಿದ್ದರೂ ಕನ್ನಡ ಭಾಷೆ ಹಾಗೂ ಸಂಸ್ಕೃತಿಯ ಮೇಲಿನ ಅಭಿಮಾನ ಅವರನ್ನು ಒಂದೇ ಕುಟುಂಬದಂತೆ ಬೆಸೆಯುತ್ತದೆ ಎಂಬ ಸಂದೇಶವನ್ನು ಈ ನಾವಿಕೋತ್ಸವ ಸಾರಲಿದೆ.
ಜಪಾನ್ ನೆಲದಲ್ಲಿ ಕನ್ನಡದ ಸಾಂಸ್ಕೃತಿಕ ವೈಭವ
ಜಪಾನ್‌ನಲ್ಲಿ ಕಳೆದ 25 ವರ್ಷಗಳಿಂದ ಕನ್ನಡ ಭಾಷೆ, ಸಂಸ್ಕೃತಿ, ಸಂಪ್ರದಾಯ ಹಾಗೂ ಕನ್ನಡಿಗರ ಒಗ್ಗಟ್ಟನ್ನು ಉಳಿಸಿ ಬೆಳೆಸುತ್ತಿರುವ ಟೋಕಿಯೊ ಕನ್ನಡ ಬಳಗ ಈ ಮಹೋತ್ಸವದ ಆತಿಥ್ಯ ವಹಿಸುತ್ತಿದೆ.
ಸಂಗೀತ, ನೃತ್ಯ, ನಾಟಕ, ಕಲೆ, ಸಾಹಿತ್ಯ ಹಾಗೂ ವೈವಿಧ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮಗಳ ಜೊತೆಗೆ ವಿಜ್ಞಾನ, ತಂತ್ರಜ್ಞಾನ, ವೈದ್ಯಕೀಯ, ವಾಣಿಜ್ಯ ಸೇರಿದಂತೆ ವಿವಿಧ ಕ್ಷೇತ್ರಗಳ ವಿಚಾರ ವಿನಿಮಯಕ್ಕೂ ವೇದಿಕೆ ಸಿದ್ಧವಾಗುತ್ತಿದೆ. ವಿವಿಧ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ಕನ್ನಡಿಗರು ತಮ್ಮ ಅನುಭವಗಳನ್ನು ಹಂಚಿಕೊಳ್ಳುವ ಮೂಲಕ ಯುವಪೀಳಿಗೆಗೆ ಸ್ಫೂರ್ತಿ ನೀಡಲಿದ್ದಾರೆ.
ಅಮೇರಿಕದಿಂದ ವಿಶ್ವದತ್ತ ಕನ್ನಡದ ಪಯಣ
2009ರಲ್ಲಿ ಸ್ಥಾಪನೆಯಾದ ‘ನಾವಿಕ’ (ನಾವು ವಿಶ್ವ ಕನ್ನಡಿಗರು) ಸಂಸ್ಥೆ ಉತ್ತರ ಅಮೇರಿಕದ ಕನ್ನಡಿಗರನ್ನು ಒಗ್ಗೂಡಿಸುವುದರ ಜೊತೆಗೆ ವಿಶ್ವದಾದ್ಯಂತ ಕನ್ನಡ ಭಾಷೆ, ಸಾಹಿತ್ಯ, ಕಲೆ ಹಾಗೂ ಸಂಸ್ಕೃತಿಯನ್ನು ಪಸರಿಸುವ ಕಾರ್ಯದಲ್ಲಿ ತೊಡಗಿಸಿಕೊಂಡಿದೆ.
ನಾವಿಕ ಸಂಸ್ಥೆಯ ಒಂದು ವಿಶೇಷ ಪರಂಪರೆಯೆಂದರೆ ಬೆಸ ಸಂಖ್ಯೆಯ ವರ್ಷಗಳಲ್ಲಿ ಅಮೇರಿಕದಲ್ಲಿ ವಿಶ್ವ ಕನ್ನಡ ಸಮ್ಮೇಳನಗಳನ್ನು ಹಾಗೂ ಸಮ ಸಂಖ್ಯೆಯ ವರ್ಷಗಳಲ್ಲಿ ಅಮೇರಿಕದ ಹೊರಗಿನ ದೇಶಗಳಲ್ಲಿ ನಾವಿಕೋತ್ಸವಗಳನ್ನು ಆಯೋಜಿಸುವುದು.
2012, 2014 ಹಾಗೂ 2016ರಲ್ಲಿ ಬೆಂಗಳೂರಿನಲ್ಲಿ, 2018ರಲ್ಲಿ ಮೈಸೂರಿನಲ್ಲಿ, 2020ರಲ್ಲಿ ಕೋವಿಡ್ ಕಾರಣದಿಂದ ಆನ್‌ಲೈನ್‌ನಲ್ಲಿ, 2022ರಲ್ಲಿ ಆಫ್ರಿಕಾದ ಕೀನ್ಯಾ ದೇಶದ ನೈರೋಬಿಯಲ್ಲಿ ಹಾಗೂ 2024ರಲ್ಲಿ ಜರ್ಮನಿಯ ಫ್ರಾಂಕ್‌ಫರ್ಟ್‌ನಲ್ಲಿ ನಾವಿಕೋತ್ಸವಗಳು ನಡೆದಿವೆ. ಈ ಪರಂಪರೆಯ ಮುಂದುವರಿಕೆಯಾಗಿ 2026ರ ಎಂಟನೇ ನಾವಿಕೋತ್ಸವ ಜಪಾನ್‌ನ ಟೋಕಿಯೊದಲ್ಲಿ ನಡೆಯಲಿದೆ.
ಭಾರತದಿಂದ ಆಫ್ರಿಕಾಕ್ಕೆ, ಅಲ್ಲಿಂದ ಯುರೋಪಿಗೆ, ಇದೀಗ ಏಷ್ಯಾದ ಜಪಾನ್‌ಗೆ ಕನ್ನಡದ ಕಂಪನ್ನು ಪಸರಿಸುತ್ತಿರುವ ನಾವಿಕದ ಈ ವಿಶ್ವಯಾತ್ರೆ ಕನ್ನಡಿಗರ ಸಾಂಸ್ಕೃತಿಕ ಒಗ್ಗಟ್ಟಿಗೆ ಸಾಕ್ಷಿಯಾಗಿದೆ.
ನಾವಿಕೋತ್ಸವದ ಜೊತೆಗೆ 9 ದಿನಗಳ ಜಪಾನ್ ಪ್ರವಾಸ!
ಈ ಬಾರಿಯ ನಾವಿಕೋತ್ಸವ ಕೇವಲ ಒಂದು ದಿನದ ಸಾಂಸ್ಕೃತಿಕ ಕಾರ್ಯಕ್ರಮಕ್ಕೆ ಸೀಮಿತವಾಗಿಲ್ಲ. ಕನ್ನಡಿಗರಿಗಾಗಿ ನವೆಂಬರ್ 21ರಿಂದ 29ರವರೆಗೆ ಎಂಟು ರಾತ್ರಿ, ಒಂಬತ್ತು ದಿನಗಳ ಜಪಾನ್ ಪ್ರವಾಸವನ್ನೂ ಆಯೋಜಿಸಲಾಗಿದೆ.
ನವೆಂಬರ್ 21ರಂದು ಕನ್ನಡಿಗರು ಟೋಕಿಯೊಗೆ ಆಗಮಿಸಲಿದ್ದು, ನವೆಂಬರ್ 22ರಂದು ದಿನವಿಡೀ ನಾವಿಕೋತ್ಸವದ ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ಭಾಗವಹಿಸಲಿದ್ದಾರೆ.
ನವೆಂಬರ್ 23ರಂದು ಟೋಕಿಯೊ ನಗರದ ಪ್ರಮುಖ ಪ್ರವಾಸಿ ತಾಣಗಳ ವೀಕ್ಷಣೆ, 24ರಂದು ವಿಶ್ವವಿಖ್ಯಾತ ಮೌಂಟ್ ಫುಜಿ ಪರ್ವತ ಹಾಗೂ ಹಕೋನೆ ಪ್ರದೇಶದ ಪ್ರಕೃತಿ ಸೌಂದರ್ಯವನ್ನು ಕಣ್ತುಂಬಿಕೊಳ್ಳಲಿದ್ದಾರೆ.
ನವೆಂಬರ್ 25ರಂದು ಎರಡನೇ ಮಹಾಯುದ್ಧದ ಇತಿಹಾಸಕ್ಕೆ ಸಾಕ್ಷಿಯಾದ ಹಿರೋಷಿಮಾ ಹಾಗೂ ಸುಂದರ ಮಿಯಾಜಿಮಾ ದ್ವೀಪಕ್ಕೆ ಭೇಟಿ ನೀಡಲಿದ್ದಾರೆ. ನಂತರ ಬುಲೆಟ್ ರೈಲಿನಲ್ಲಿ ಒಸಾಕಾಕ್ಕೆ ಪ್ರಯಾಣ ಬೆಳೆಸಲಿದ್ದಾರೆ. ನವೆಂಬರ್ 26ರಂದು ಜಪಾನ್‌ನ ಪ್ರಾಚೀನ ಸಂಸ್ಕೃತಿ ಮತ್ತು ಐತಿಹಾಸಿಕ ದೇವಾಲಯಗಳಿಗೆ ಪ್ರಸಿದ್ಧವಾದ ಕ್ಯೋಟೊ ನಗರವನ್ನು ವೀಕ್ಷಿಸಲಿದ್ದಾರೆ.
ನವೆಂಬರ್ 27ರಂದು ಒಸಾಕಾ ನಗರ ಹಾಗೂ ನಾರಾದ ಪ್ರಸಿದ್ಧ ಜಿಂಕೆ ಉದ್ಯಾನವನದ ವೀಕ್ಷಣೆ ನಡೆಯಲಿದೆ. ನವೆಂಬರ್ 28ರಂದು ಬುಲೆಟ್ ರೈಲಿನ ಮೂಲಕ ಟೋಕಿಯೊಗೆ ಮರಳಲಿದ್ದು, ನವೆಂಬರ್ 29ರಂದು ಟೋಕಿಯೊ ವಿಮಾನ ನಿಲ್ದಾಣದಿಂದ ತಮ್ಮ ಮುಂದಿನ ಪ್ರಯಾಣಕ್ಕೆ ತೆರಳಲಿದ್ದಾರೆ.
ಈ ಪ್ರವಾಸದಲ್ಲಿ ಜಪಾನ್‌ನ ಆಧುನಿಕ ತಂತ್ರಜ್ಞಾನ, ಬುಲೆಟ್ ರೈಲು ಪ್ರಯಾಣ, ಶಿಸ್ತುಬದ್ಧ ಜೀವನಶೈಲಿ, ಐತಿಹಾಸಿಕ ಪರಂಪರೆ ಹಾಗೂ ನಿಸರ್ಗ ಸೌಂದರ್ಯವನ್ನು ಕಣ್ತುಂಬಿಕೊಳ್ಳುವ ಅವಕಾಶ ದೊರೆಯಲಿದೆ.
ಜಪಾನ್ ನೆಲದಲ್ಲಿ ಕನ್ನಡದ ವಿಶ್ವಬಾಂಧವ್ಯ
ಜಪಾನ್ ಎಂದರೆ ಶಿಸ್ತು, ಸಮಯಪ್ರಜ್ಞೆ, ಪರಿಶ್ರಮ ಹಾಗೂ ತಂತ್ರಜ್ಞಾನದ ಸಂಕೇತ. ಕನ್ನಡಿಗರು ಎಂದರೆ ಭಾಷಾಭಿಮಾನ, ಆತಿಥ್ಯ, ಕಲೆ, ಸಾಹಿತ್ಯ ಹಾಗೂ ಸಂಸ್ಕೃತಿಯ ಪ್ರತೀಕ. ಈ ಎರಡೂ ಸಂಸ್ಕೃತಿಗಳು ಟೋಕಿಯೊದಲ್ಲಿ ಒಂದಾಗುತ್ತಿರುವುದು ಈ ಬಾರಿಯ ನಾವಿಕೋತ್ಸವದ ವಿಶೇಷ ಆಕರ್ಷಣೆ.
ರಾಷ್ಟ್ರಕವಿ ಕುವೆಂಪು ಅವರ ಅಮರ ಸಂದೇಶವಾದ “ಎಲ್ಲಾದರೂ ಇರು, ಎಂತಾದರೂ ಇರು, ಎಂದೆಂದಿಗೂ ನೀ ಕನ್ನಡವಾಗಿರು” ಎಂಬ ಆಶಯಕ್ಕೆ ಈ ನಾವಿಕೋತ್ಸವ ಜೀವಂತ ಉದಾಹರಣೆಯಾಗಲಿದೆ. ದೇಶ ಬೇರೆಯಾದರೂ ಭಾಷೆ ಕನ್ನಡ, ನೆಲ ಬೇರೆಯಾದರೂ ಹೃದಯ ಕನ್ನಡ!
ಉದಯರವಿಯ ನಾಡಿನಲ್ಲಿ ಕನ್ನಡದ ಕಂಪು ಹರಡಲಿ, ವಿಶ್ವ ಕನ್ನಡಿಗರ ಬಾಂಧವ್ಯ ಮತ್ತಷ್ಟು ಗಟ್ಟಿಯಾಗಲಿ!
— ಬೆಂಕಿ ಬಸಣ್ಣ, ನ್ಯೂಯಾರ್ಕ್
