ಬೆಂಕಿ ಬಸಣ್ಣ, ನ್ಯೂಯಾರ್ಕ್
ಆಲ್ಬನಿ, ನ್ಯೂಯಾರ್ಕ್: ಆಲ್ಬನಿ ಪ್ರದೇಶದ ಕ್ಯಾಪಿಟಲ್ ಡಿಸ್ಟ್ರಿಕ್ಟ್ ಕನ್ನಡ ಕೂಟ (KKCD) ಸದಸ್ಯರಾದ ಉಮಾ ಬೆಂಕಿ ಮತ್ತು ಸುಪ್ರಿಯಾ ವಾಳ್ವೇಕರ್ ಅವರು ರವಿವಾರ ಆಲ್ಬನಿಯ ಕಾರ್ನಿಂಗ್ ಟವರ್ನಲ್ಲಿ ನಡೆದ Tunnel to Towers Capital Region Tower Climb ಕಾರ್ಯಕ್ರಮದಲ್ಲಿ ಭಾಗವಹಿಸಿ, 42ನೇ ಮಹಡಿಯವರೆಗೆ 809 ಮೆಟ್ಟಿಲುಗಳನ್ನು ಯಶಸ್ವಿಯಾಗಿ ಏರಿದರು.
ಸೆಪ್ಟೆಂಬರ್ 11ರ ಭಯೋತ್ಪಾದಕ ದಾಳಿಯಲ್ಲಿ ಪ್ರಾಣತ್ಯಾಗ ಮಾಡಿದ ಅಗ್ನಿಶಾಮಕ ಸಿಬ್ಬಂದಿ ಹಾಗೂ ಇತರ ವೀರರ ಸ್ಮರಣಾರ್ಥ ನಡೆಯುವ ಈ ಕಾರ್ಯಕ್ರಮವು ಮೊದಲ ಪ್ರತಿಕ್ರಿಯೆದಾರರು, ಸೇನಾ ಸಿಬ್ಬಂದಿ ಹಾಗೂ ಅವರ ಕುಟುಂಬಗಳಿಗೆ ಬೆಂಬಲ ನೀಡುವ ಉದ್ದೇಶ ಹೊಂದಿದೆ.
ಉಮಾ ಮತ್ತು ಸುಪ್ರಿಯಾ ಇಬ್ಬರೂ ನ್ಯೂಯಾರ್ಕ್ ರಾಜ್ಯದ Office of Information Technology Services (ITS) ಉದ್ಯೋಗಿಗಳಾಗಿದ್ದು, Public Employees Federation (PEF) ತಂಡವನ್ನು ಪ್ರತಿನಿಧಿಸಿ ಈ ಸಾಹಸದಲ್ಲಿ ಪಾಲ್ಗೊಂಡರು.
ವಿಶೇಷವೆಂದರೆ, ಹಿಂದಿನ ದಿನವಿಡೀ ನಡೆದ ಕ್ರಿಕೆಟ್ ಪಂದ್ಯಾವಳಿಯಲ್ಲಿ ಆಡಿದ್ದ ಉಮಾ, ಫೈನಲ್ ಪಂದ್ಯದಲ್ಲಿ ಮೂರು ವಿಕೆಟ್ಗಳನ್ನು ಪಡೆದಿದ್ದರು. ಸಾಹಸ ಚಟುವಟಿಕೆಗಳಲ್ಲಿ ಆಸಕ್ತಿ ಹೊಂದಿರುವ ಉಮಾ, 2025ರ ಏಪ್ರಿಲ್ನಲ್ಲಿ ವಿಶ್ವದ ಅತಿ ಎತ್ತರದ ಶಿಖರ ಮೌಂಟ್ ಎವರೆಸ್ಟ್ನ ಬೇಸ್ ಕ್ಯಾಂಪ್ನ್ನೂ ಯಶಸ್ವಿಯಾಗಿ ತಲುಪಿದ್ದರು.
ಉಮಾ ಬೆಂಕಿ ಮತ್ತು ಸುಪ್ರಿಯಾ ವಾಳ್ವೇಕರ್ ಅವರ ಈ ಸಾಧನೆಗೆ ಕ್ಯಾಪಿಟಲ್ ಡಿಸ್ಟ್ರಿಕ್ಟ್ ಕನ್ನಡ ಕೂಟದ ಸದಸ್ಯರು ಅಭಿನಂದನೆ ಸಲ್ಲಿಸಿದ್ದಾರೆ.
ಕೊನೆಯದಾಗಿ ಒಂದು ತಮಾಷೆ — ಉಮಾ ನಿಜಕ್ಕೂ ಅನುಭವಿ “ಫೈರ್ಫೈಟರ್”; ಏಕೆಂದರೆ ಅವರು ಮನೆಯಲ್ಲಿ ಬೆಂಕಿ (ಬಸಣ್ಣ) ಜೊತೆ ಸದಾ ಫೈಟ್ ಮಾಡುತ್ತಾರೆ!
