ಮನಾಮ: ಶ್ರೀ ನಾರಾಯಣ ಗುರುಗಳ 172ನೇ ಜಯಂತಿಯ ಅಂಗವಾಗಿ “Tribute to Bahrain – The Confluence of Cultures, The Spirit of Humanism” ಎಂಬ ಶೀರ್ಷಿಕೆಯಡಿ ಅದ್ಧೂರಿ ಸಾಮಾಜಿಕ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮವು 2026ರ ಇತ್ತೀಚೆಗೆ ಬಹರೈನ್ ಕೇರಳೀಯ ಸಮಾಜಂ ಸಭಾಂಗಣದಲ್ಲಿ ವೈಭವದಿಂದ ನಡೆಯಿತು.
ಶ್ರೀ ನಾರಾಯಣ ಗುರು ಕಲ್ಚರಲ್ ಸೊಸೈಟಿ (SNCS) ಹಾಗೂ ಗುರು ಸೇವಾ ಸಮಿತಿ–ಬಹರೈನ್ ಬಿಲ್ಲವಾಸ್‌ಗಳ ಜಂಟಿ ಆಶ್ರಯದಲ್ಲಿ ಆಯೋಜಿಸಲಾದ ಈ ಕಾರ್ಯಕ್ರಮವು ವಿವಿಧ ಸಂಸ್ಕೃತಿಗಳ ಸಾಮರಸ್ಯ, ಮಾನವೀಯ ಮೌಲ್ಯಗಳು, ಸೇವಾ ಮನೋಭಾವ ಮತ್ತು ಸಾಮಾಜಿಕ ಏಕತೆಯ ಸಂದೇಶವನ್ನು ಸಾರಿತು.
ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತ ಬ್ರಹ್ಮಶ್ರೀ ವಿಸುದಾನಂದ ಸ್ವಾಮೀಜಿಯವರ ದಿವ್ಯ ಉಪಸ್ಥಿತಿ ಹಾಗೂ ಉದ್ಘಾಟನೆಯೊಂದಿಗೆ ಕಾರ್ಯಕ್ರಮಕ್ಕೆ ಭವ್ಯ ಚಾಲನೆ ದೊರೆಯಿತು. ಬಹರೈನ್‌ನ ನೂತನ ಭಾರತೀಯ ರಾಯಭಾರಿ ಡಾ. ಪ್ರದೀಪ್ ಸಿಂಗ್ ರಜಪೂತ್ ಅವರು ಮುಖ್ಯ ಅತಿಥಿಯಾಗಿ ಭಾಗವಹಿಸಿ ಕಾರ್ಯಕ್ರಮದ ಗೌರವವನ್ನು ಹೆಚ್ಚಿಸಿದರು.
ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿ ಅಧ್ಯಕ್ಷರಾದ ಬಿ.ಕೆ.ಹರಿಪ್ರಸಾದ್ ಹಾಗೂ ಕೇರಳ ವಿಧಾನಸಭಾ ಸದಸ್ಯರಾದ ಚಾಂಡಿ ಊಮ್ಮನ್ ಅವರು ಗೌರವ ಅತಿಥಿಗಳಾಗಿ ಉಪಸ್ಥಿತರಿದ್ದರು. ಯುನೀಕೋ ಸಂಸ್ಥೆಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಹಾಗೂ ಮಂಡಳಿ ಸದಸ್ಯರಾದ ವಿ. ಜಯಶಂಕರ್ ಮತ್ತು ದೇವಜಿ ಗ್ರೂಪ್‌ನ ವ್ಯವಸ್ಥಾಪಕ ನಿರ್ದೇಶಕರಾದ ಮಹೇಶ್ ದೇವಜಿ ಸೇರಿದಂತೆ ಹಲವು ಗಣ್ಯರು ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದರು.
ಸಾಧಕರಿಗೆ ಶ್ರೀ ನಾರಾಯಣ ಗುರು ಪ್ರಶಸ್ತಿಗಳ ಗೌರವ
ಸಮಾಜದ ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸಾಧನೆ ಮಾಡಿದ ಗಣ್ಯರನ್ನು ಗುರುತಿಸಿ ಗೌರವಿಸುವ ಮೂಲಕ ಕಾರ್ಯಕ್ರಮವು ವಿಶೇಷ ಮೆರುಗು ಪಡೆದುಕೊಂಡಿತು.
ಗೋಕುಲಂ ಗೋಪಾಲನ್ ಅವರಿಗೆ ‘ಶ್ರೀ ನಾರಾಯಣ ಗುರು ಎಕ್ಸಲೆನ್ಸ್ ಅವಾರ್ಡ್ 2026’, ಕೆ. ಜಿ. ಬಾಬುರಾಜನ್ ಅವರಿಗೆ ‘ಶ್ರೀ ನಾರಾಯಣ ಗುರು ಕರ್ಮಶ್ರೇಷ್ಠ ಪ್ರಶಸ್ತಿ 2026’, ಪಂಬಾವಾಸನ್ ನಾಯರ್ ಅವರಿಗೆ ‘ಶ್ರೀ ನಾರಾಯಣ ಗುರು ಮಾನವೀಯ ಸೇವಾ ಪ್ರಶಸ್ತಿ 2026’ ಹಾಗೂ ವಿ. ಜಯಶಂಕರ್ ಅವರಿಗೆ ‘ಶ್ರೀ ನಾರಾಯಣ ಗುರು ಸಮಾಜ ಸೇವಾ ಪ್ರಶಸ್ತಿ 2026’ ನೀಡಿ ಗೌರವಿಸಲಾಯಿತು.
ಇದಲ್ಲದೆ, ಫಟ್ಟಾರಂ ಚಾಂಡೆಲಿಯಾ, ಅಶೋಕ್ ಕುಮಾರ್, ಬಿಸ್ವಾಸ್ ಕೃಷ್ಣ ನಾರಾಯಣನ್ ಹಾಗೂ ಅಂಬಲತ್ತಾರ ರಾಜನ್ ಅವರನ್ನು ನಾಯಕತ್ವ ಮತ್ತು ಸಮಾಜಕ್ಕೆ ನೀಡಿದ ಮಹತ್ವದ ಕೊಡುಗೆಗಳಿಗಾಗಿ ಸನ್ಮಾನಿಸಲಾಯಿತು.
ವೇದಿಕೆಯಲ್ಲಿ ತೆರೆದುಕೊಂಡ ವೈವಿಧ್ಯಮಯ ಸಾಂಸ್ಕ್ರತಿಕ ಲೋಕ
ಸಾಂಸ್ಕ್ರತಿಕ ಕಾರ್ಯಕ್ರಮದ ಅಂಗವಾಗಿ ಬಹರೈನ್ ಬಿಲ್ಲವಾಸ್ ಹಾಗು ಶ್ರೀ ನಾರಾಯಣ ಗುರು ಕಲ್ಚರಲ್ ಸೊಸೈಟಿಯ ಪ್ರತಿಭಾವಂತ ಕಲಾವಿದರುಗಳಿಂದ ರಂಗದಲ್ಲಿ ವೈವಿಧ್ಯಮಯ ನ್ರತ್ಯ ಪ್ರದರ್ಶನಗಳು ಅತ್ಯಂತ ಆಕರ್ಷಕವಾಗಿ ಮೂಡಿಬಂದು, ಭಾರತೀಯ ಸಂಸ್ಕ್ರತಿಯ ಅಗಾಧ ಪರಿಚಯವನ್ನು ನೀಡಿ ನೆರೆದ ಪ್ರೇಕ್ಷಕರು ಮಂತ್ರಮುಗ್ದರಾಗುವಂತೆ ಮಾಡಿತು .
1,200ಕ್ಕೂ ಅಧಿಕ ಮಂದಿಯ ಸಮ್ಮುಖದಲ್ಲಿ ಸಂಗೀತ ರಸದೌತಣ
ಕಾರ್ಯಕ್ರಮದಲ್ಲಿ 1,200ಕ್ಕೂ ಅಧಿಕ ಮಂದಿ ಭಾಗವಹಿಸಿ ಸಮಾರಂಭದ ಯಶಸ್ಸಿಗೆ ಸಾಕ್ಷಿಯಾದರು. ಸಮಾರಂಭದ ಅಂತಿಮ ಭಾಗದಲ್ಲಿ ನಡೆದ ‘ಮ್ಯೂಸಿಕಲ್ ನೈಟ್’ ಪ್ರೇಕ್ಷಕರಿಗೆ ಸಂಗೀತದ ರಸದೌತಣ ನೀಡಿತು.
ಖ್ಯಾತ ಹಿನ್ನೆಲೆ ಗಾಯಕ ಲಿಬಿನ್ ಜಕಾರಿಯಾ ಹಾಗೂ ಗಾಯಕಿ ಕೀರ್ತನಾ ಎಸ್. ಕೆ. ಅವರ ಸಂಗೀತ ಪ್ರಸ್ತುತಿಗಳು ನೆರೆದಿದ್ದವರನ್ನು ರಂಜಿಸಿ, ಕಾರ್ಯಕ್ರಮಕ್ಕೆ ಮತ್ತಷ್ಟು ಮೆರುಗು ನೀಡಿದವು.
ಏಕತೆ, ಸೇವೆ ಮತ್ತು ಮಾನವೀಯತೆಯ ಸಾರ್ಥಕ ಸಂದೇಶ
ಶ್ರೀ ನಾರಾಯಣ ಗುರುಗಳ ಸಮಾನತೆ, ಮಾನವೀಯತೆ ಮತ್ತು ಸಹೋದರತ್ವದ ತತ್ವಗಳನ್ನು ಸಾರಿದ ‘ಟ್ರಿಬ್ಯೂಟ್ ಟು ಬಹರೈನ್’ ಕಾರ್ಯಕ್ರಮವು ಬಹರೈನ್‌ನ ಬಹುಸಾಂಸ್ಕೃತಿಕ ವಾತಾವರಣದಲ್ಲಿ ಭಾರತೀಯ ಸಮುದಾಯದ ಸೌಹಾರ್ದತೆ ಹಾಗೂ ಸಾಮಾಜಿಕ ಬದ್ಧತೆಯನ್ನು ಪ್ರತಿಬಿಂಬಿಸಿತು.
ಕಾರ್ಯಕ್ರಮದ ಯಶಸ್ಸಿಗೆ ಸಹಕರಿಸಿದ ಗಣ್ಯರು, ಸಮುದಾಯದ ಸದಸ್ಯರು, ಪ್ರಾಯೋಜಕರು ಹಾಗೂ ಎಲ್ಲ ಸಹಕಾರಿಗಳಿಗೆ ಆಯೋಜಕರು ಹೃತ್ಪೂರ್ವಕ ಕೃತಜ್ಞತೆ ಸಲ್ಲಿಸಿದರು.
ಸಾಂಸ್ಕೃತಿಕ ವೈಭವ, ಸಾಧಕರಿಗೆ ಗೌರವ, ಸಂಗೀತದ ಸಂಭ್ರಮ ಮತ್ತು ಮಾನವೀಯ ಮೌಲ್ಯಗಳ ಸಮಾಗಮದೊಂದಿಗೆ ‘ಟ್ರಿಬ್ಯೂಟ್ ಟು ಬಹರೈನ್’ ಕಾರ್ಯಕ್ರಮವು ಸ್ಮರಣೀಯ ಸಮಾರಂಭವಾಗಿ ಮೂಡಿಬಂತು.
ಶ್ರೀ ನಾರಾಯಣ ಗುರುಗಳ ಸಮಾನತೆ, ಸಹೋದರತ್ವ ಮತ್ತು ಮಾನವೀಯತೆಯ ಸಂದೇಶವನ್ನು ಸಾರಿದ ಈ ಕಾರ್ಯಕ್ರಮವು ಬಹರೈನ್‌ನ ಬಹುಸಾಂಸ್ಕೃತಿಕ ವಾತಾವರಣದಲ್ಲಿ ಏಕತೆ ಮತ್ತು ಸೌಹಾರ್ದತೆಯ ಮಹತ್ವವನ್ನು ಎತ್ತಿಹಿಡಿಯಿತು. ಕಾರ್ಯಕ್ರಮದ ಯಶಸ್ಸಿಗೆ ಸಹಕರಿಸಿದ ಗಣ್ಯರು, ಸಮುದಾಯದ ಸದಸ್ಯರು ಹಾಗೂ ಪ್ರಾಯೋಜಕರಿಗೆ ಆಯೋಜಕರು ಕೃತಜ್ಞತೆ ಸಲ್ಲಿಸಿದರು.
ವರದಿ-ಕಮಲಾಕ್ಷ ಅಮೀನ್
