ನ್ಯೂಯಾರ್ಕ್ ರಾಜ್ಯದ ರಾಜಧಾನಿ ಅಲ್ಬನಿಯಲ್ಲಿರುವ ಕನ್ನಡಿಗರು, ಇತ್ತೀಚೆಗೆ ಇಲ್ಲಿರುವ ಹಿಂದೂ ದೇವಸ್ಥಾನದಲ್ಲಿ ವಿಶೇಷ ಮಸಾಲ ದೋಸೆಯ ಅಡಿಗೆಯನ್ನು ಮಾಡಿ ಅದರಿಂದ ಬಂದ ಲಾಭವನ್ನೆಲ್ಲ ದೇವಸ್ಥಾನಕ್ಕೆ ದಾನ ಮಾಡಿದರು.
ಬಿಸಿ ಬಿಸಿ ಮಸಾಲ ದೋಸೆ, ಚಟ್ನಿ, ಆಲೂಗಡ್ಡೆ ಪಲ್ಯ, ಕೇಸರಿ ಬಾತು, ಮೊಸರನ್ನ, ಕೋಸಂಬರಿ, ಮಸಾಲ ಚಹಾ ಹೀಗೆ ಹಲವಾರು ರುಚಿ ರುಚಿಯಾದ ಖಾದ್ಯಗಳನ್ನು ತಯಾರಿಸಿದ್ದರು. ಇದರ ನೇತೃತ್ವವನ್ನು ಆಲ್ಬನಿಯಲ್ಲಿ ಅನೇಕ ದಶಕಗಳಿಂದ ನೆಲೆಸಿರುವ ಹಿರಿಯರಾದ ಮೈತಿಲಿ ದಿವಾಕರ್ ವಹಿಸಿದ್ದರು.
ಗಂಟೆಗಟ್ಟಲೆ ಸಾಲಿನಲ್ಲಿ ನಿಂತು ಜನರು ರುಚಿಯಾದ ಬಿಸಿ-ದೋಸೆಯನ್ನು ಸವಿದರು. ತಮಿಳು, ತೆಲುಗು, ಗುಜರಾತಿ ಹೀಗೆ ಅನೇಕ ಸಂಘಗಳು ಹಿಂದೂ ದೇವಸ್ಥಾನದಲ್ಲಿ ಅಡುಗೆಯನ್ನು ಮಾಡುತ್ತವೆ. ಆದರೆ ಕನ್ನಡ ಸಂಘದ ಸ್ಪೆಷಲ್ ಮಸಾಲಾ ದೋಸೆ ತುಂಬಾ ಜನಪ್ರಿಯವಾಗಿದೆ. ಬೆಳಗ್ಗೆ 6 ಗಂಟೆಗೆ ಎದ್ದು ಬಂದು ನೂರಾರು ಜನರಿಗೆ ಅಡುಗೆ ಮಾಡಿದ ಸ್ವಯಂಸೇವಕರಿಗೆ ಮತ್ತು ಕನ್ನಡ ಯೂಥ್ ಕ್ಲಬ್ ನ ಮಕ್ಕಳಿಗೆ ಆಲ್ಬನಿ ಕನ್ನಡ ಸಂಘದ ಅಧ್ಯಕ್ಷೆ ಜ್ಯೋತಿ ಮುರುಂಡಿಯವರು ತುಂಬು ಹೃದಯದ ಧನ್ಯವಾದಗಳು ತಿಳಿಸಿದರು.
ವರದಿ: ಬೆಂಕಿ ಬಸಣ್ಣ, ನ್ಯೂಯಾರ್ಕ್
