ಅಮೇರಿಕ; ಭಕ್ತಿ, ಬಸವತತ್ವ, ನಾಟಕ-ನೃತ್ಯ ವೈಭವದಿಂದ ಕಂಗೊಳಿಸಿದ VSNA ಮಹಾಸಮ್ಮೇಳನದ ಎರಡನೇ ದಿನ

ವರದಿ: ಬೆಂಕಿ ಬಸಣ್ಣ, ನ್ಯೂಯಾರ್ಕ್

ಸ್ಯಾನ್‌ಫೋರ್ಡ್ (ಉತ್ತರ ಕೆರೊಲಿನಾ: 48ನೇ ವೀರಶೈವ ಸೊಸೈಟಿ ಆಫ್ ನಾರ್ತ್ ಅಮೇರಿಕ (VSNA) ಮಹಾಸಮ್ಮೇಳನದ ಎರಡನೇ ಹಾಗೂ ಅಂತಿಮ ದಿನ ಧಾರ್ಮಿಕ ಆಚರಣೆಗಳು, ಸಾಂಸ್ಕೃತಿಕ ವೈಭವ, ಚಿಂತನಾತ್ಮಕ ನಾಟಕಗಳು, ನೃತ್ಯರೂಪಕಗಳು ಹಾಗೂ ಸಂಗೀತ ಕಾರ್ಯಕ್ರಮಗಳ ಸಮ್ಮಿಲನವಾಗಿ ಮೂಡಿಬಂತು.

ರವಿವಾರ ಬೆಳಗ್ಗೆ 7 ಗಂಟೆಗೆ ಆರಂಭವಾದ ಕಾರ್ಯಕ್ರಮಗಳು ರಾತ್ರಿ 11.30ರವರೆಗೆ ನಿರಂತರವಾಗಿ ಸಾಗಿದವು. ಅಮೇರಿಕ ಹಾಗೂ ಕೆನಡಾದ ವಿವಿಧ ರಾಜ್ಯಗಳಿಂದ ಆಗಮಿಸಿದ್ದ ವೀರಶೈವ-ಲಿಂಗಾಯತ ಕುಟುಂಬಗಳು, ಬಸವಾಭಿಮಾನಿಗಳು ಹಾಗೂ ಕನ್ನಡಿಗರು ದಿನವಿಡೀ ಉತ್ಸಾಹದಿಂದ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದರು.

ಮೊದಲ ದಿನದ ಯಶಸ್ಸಿನ ಬಳಿಕ ಎರಡನೇ ದಿನವೂ ಸಮ್ಮೇಳನದ ವಾತಾವರಣ ಮತ್ತಷ್ಟು ಉತ್ಸಾಹಭರಿತವಾಗಿತ್ತು. ಉತ್ತರ ಕೆರೊಲಿನಾ ಘಟಕದ ಸಂಘಟಕರು ಹಾಗೂ ನೂರಾರು ಸ್ವಯಂಸೇವಕರು ಪ್ರತಿಯೊಂದು ಕಾರ್ಯಕ್ರಮವನ್ನು ಸಮಯಕ್ಕೆ ಸರಿಯಾಗಿ ನಡೆಸುವ ಮೂಲಕ ಮತ್ತೊಮ್ಮೆ ತಮ್ಮ ಸಂಘಟನಾ ಸಾಮರ್ಥ್ಯವನ್ನು ಪ್ರದರ್ಶಿಸಿದರು.

ಸಾಮೂಹಿಕ ಲಿಂಗಪೂಜೆ ಮತ್ತು ಯೋಗದೊಂದಿಗೆ ದಿನದ ಆರಂಭ
ಬೆಳಗ್ಗೆ ಎರಡನೇ ದಿನದ ಕಾರ್ಯಕ್ರಮಗಳು ಎರಡು ಸಮಾನಾಂತರ ಚಟುವಟಿಕೆಗಳೊಂದಿಗೆ ಆರಂಭವಾದವು. ಒಂದೆಡೆ ನೂರಾರು ಭಕ್ತರು ಭಕ್ತಿಭಾವದಿಂದ ಸಾಮೂಹಿಕ ಲಿಂಗಪೂಜೆಯಲ್ಲಿ ಭಾಗವಹಿಸಿ ಜಗಜ್ಯೋತಿ ಬಸವಣ್ಣನವರ ತತ್ವಗಳನ್ನು ಸ್ಮರಿಸಿದರು. ಮತ್ತೊಂದೆಡೆ ಆರೋಗ್ಯ ಮತ್ತು ಮನಸ್ಸಿನ ನೆಮ್ಮದಿಗೆ ಒತ್ತು ನೀಡುವ ಯೋಗ ಕಾರ್ಯಕ್ರಮ ನಡೆಯಿತು. ತಮ್ಮ ಆಸಕ್ತಿಗೆ ಅನುಗುಣವಾಗಿ ಪ್ರತಿನಿಧಿಗಳು ಈ ಎರಡೂ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿ ದಿನವನ್ನು ಉತ್ಸಾಹದಿಂದ ಆರಂಭಿಸಿದರು.

ಇದರ ಬಳಿಕ ಸಭಿಕರಿಗೆ ಆತ್ಮೀಯವಾಗಿ ರುಚಿಕರ ಉಪಾಹಾರವನ್ನು ಬಡಿಸಲಾಯಿತು. ದಿನವಿಡೀ ಉತ್ತಮ ಆಹಾರ ವ್ಯವಸ್ಥೆ, ಸಮಯಪಾಲನೆ ಹಾಗೂ ಆತಿಥ್ಯಕ್ಕೆ ಭಾಗವಹಿಸಿದವರು ಮೆಚ್ಚುಗೆ ವ್ಯಕ್ತಪಡಿಸಿದರು.

‘ವೀರ ವಚನ ಗಾಸೆ’ಯಿಂದ ಕಳೆಗಟ್ಟಿದ ವೇದಿಕೆ
ಬೆಳಗಿನ ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ VSNA ಡೆಟ್ರಾಯಿಟ್ ತಂಡದ “ವೀರ ವಚನ ಗಾಸೆ” ಕಾರ್ಯಕ್ರಮ ಸಭಾಂಗಣದಲ್ಲಿ ಹೊಸ ಉತ್ಸಾಹ ತುಂಬಿತು.

ವೀರಗಾಸೆಯ ಸಾಂಪ್ರದಾಯಿಕ ಹೆಜ್ಜೆಗಳು, ಡೊಳ್ಳಿನ ಘರ್ಜನೆ, ಖಡ್ಗ ಪ್ರದರ್ಶನ ಹಾಗೂ ಬಸವಣ್ಣನವರ ವಚನಗಳ ಸೊಗಸಾದ ಸಂಯೋಜನೆ ವೀರಶೈವ ಪರಂಪರೆಯ ಶೌರ್ಯ, ಭಕ್ತಿ ಮತ್ತು ಸಂಸ್ಕೃತಿಯನ್ನು ಅನಾವರಣಗೊಳಿಸಿತು. ಕಲಾವಿದರ ಶಕ್ತಿ, ಲಯಬದ್ಧ ಹೆಜ್ಜೆಗಳು ಹಾಗೂ ವೇದಿಕೆಯ ಮೇಲಿನ ಅವರ ಆತ್ಮವಿಶ್ವಾಸ ಪ್ರೇಕ್ಷಕರನ್ನು ಆಕರ್ಷಿಸಿತು. ಕಾರ್ಯಕ್ರಮ ಮುಗಿಯುವ ಹೊತ್ತಿಗೆ ಸಭಾಂಗಣ ಕರತಾಡನದಿಂದ ಮೊಳಗಿತು.

ಅನುಭವ ಮಂಟಪ’ ನಾಟಕ ಜೀವಂತ ಅನುಭವ ನೀಡಿತು
ಎರಡನೇ ದಿನದ ಅತ್ಯಂತ ಪ್ರಶಂಸೆಗೆ ಪಾತ್ರವಾದ ಕಾರ್ಯಕ್ರಮಗಳಲ್ಲಿ “ಅನುಭವ ಮಂಟಪ” ನಾಟಕ ಪ್ರಮುಖವಾಗಿತ್ತು. ವಿಶ್ ಹಾಗೂ ರೇಶ್ಮಾ ತರುವೆಸಂಚಿ ಅವರ ನಿರ್ದೇಶನದಲ್ಲಿ, ಸುದೀಪ್ ಶಾನುಭೋಗ್ ಅವರ ಸಂಗೀತ ಸಂಯೋಜನೆಯೊಂದಿಗೆ ಮೂಡಿಬಂದ ಈ ನಾಟಕವು ಬಸವಣ್ಣ, ಅಲ್ಲಮಪ್ರಭು, ಅಕ್ಕಮಹಾದೇವಿ ಸೇರಿದಂತೆ ಶಿವಶರಣರ ಚಿಂತನೆಯನ್ನು ಜೀವಂತವಾಗಿ ವೇದಿಕೆಗೆ ತಂದಿತು.

ನಾಟಕದಲ್ಲಿ ರವಿ ಕಲ್ಮಠ, ತೇಜಸ್ವಿನಿ ಕಗ್ಗೆರೆ, ಮಂಜುನಾಥ ಪಪ್ಪೂರ, ಬಸವರಾಜ ಖಾಪಲಿ, ಜಯರಾಜ ಕಲ್ಮಠ, ವಿಶ್ವತೇಜ ತರುವೆಸಂಚಿ, ರಾಕೇಶ್ ಮನೋಹರ ಸೇರಿದಂತೆ ಶಿವಶರಣರು ಹಾಗೂ ಶಿವಶರಣೆಗಳ ಪಾತ್ರಧಾರಿಗಳು ತಮ್ಮ ಸಹಜ ಅಭಿನಯದಿಂದ ಪ್ರೇಕ್ಷಕರನ್ನು 12ನೇ ಶತಮಾನದ ಕಲ್ಯಾಣದ ಅನುಭವ ಮಂಟಪಕ್ಕೆ ಕರೆದೊಯ್ದರು.

ಸಮಾನತೆ, ಕಾಯಕ, ದಾಸೋಹ, ಸಾಮಾಜಿಕ ನ್ಯಾಯ ಹಾಗೂ ಮಾನವೀಯತೆಯ ಸಂದೇಶವನ್ನು ನಾಟಕ ಪರಿಣಾಮಕಾರಿಯಾಗಿ ಬಿಂಬಿಸಿತು. ವೇದಿಕೆಯ ವಿನ್ಯಾಸ, ಬೆಳಕಿನ ವ್ಯವಸ್ಥೆ, ಹಿನ್ನೆಲೆ ಸಂಗೀತ ಮತ್ತು ಸಂಭಾಷಣೆಗಳು ನಾಟಕಕ್ಕೆ ವಿಶೇಷ ಮೆರುಗು ನೀಡಿದವು. ವಿಶೇಷವಾಗಿ ಅಮೇರಿಕದಲ್ಲಿ ಜನಿಸಿ ಬೆಳೆದ ಯುವಪೀಳಿಗೆಗೆ ಬಸವಣ್ಣನವರ ವಿಚಾರಧಾರೆಯನ್ನು ಪರಿಚಯಿಸುವಲ್ಲಿ ಈ ನಾಟಕ ಯಶಸ್ವಿಯಾಯಿತು.

AI ಮತ್ತು ಬಸವತತ್ವಗಳ ಸಮನ್ವಯ
ಸಮ್ಮೇಳನದ ಮತ್ತೊಂದು ವಿಶೇಷ ಆಕರ್ಷಣೆಯಾಗಿದ್ದ “AI ಕ್ರಾಂತಿಯೋಗಿ – Robot ಕರ್ಮಯೋಗಿ” ಹಾಸ್ಯ ನಾಟಕವು ಆಧುನಿಕ ತಂತ್ರಜ್ಞಾನ ಮತ್ತು ಬಸವ ತತ್ವಗಳ ನಡುವೆ ಚಿಂತನಾತ್ಮಕ ಸೇತುವೆ ನಿರ್ಮಿಸಿತು.

ಮಲ್ಲಿ ಸಣ್ಣಪ್ಪನವರ ಅವರ ಕಥೆ ಹಾಗೂ ನಿರ್ದೇಶನದಲ್ಲಿ ಮೂಡಿಬಂದ ಈ ನಗೆ ನಾಟಕದಲ್ಲಿ ಕೃತಕ ಬುದ್ಧಿಮತ್ತೆ ಎಷ್ಟೇ ಬೆಳೆಯಲಿ, ಮಾನವೀಯ ಮೌಲ್ಯಗಳಿಗೆ ಪರ್ಯಾಯವಿಲ್ಲ ಎಂಬ ಸಂದೇಶವನ್ನು ಪರಿಣಾಮಕಾರಿಯಾಗಿ ಬಿಂಬಿಸಲಾಯಿತು.

ಈ ನಾಟಕದಲ್ಲಿ ಮಲ್ಲಿ ಸಣ್ಣಪ್ಪನವರ, ಸುಮಾ ಬಸಂತ್, ಬಸಂತ್ ಎಂ., ಮಧು ಸಣ್ಣಪ್ಪನವರ, ದಿಯಾ ಬಾಳೂರು, ಸ್ನೇಹಾ ಬಾಳೂರು, ಕವಿತಾ ಬಾಳೂರು, ಅನಿಲಕುಮಾರ್ ಹಾಗೂ ನಟರಾಜ್ ಶರಣಪ್ಪ ತಮ್ಮ ಅಭಿನಯದ ಮೂಲಕ ಪ್ರೇಕ್ಷಕರ ಗಮನ ಸೆಳೆದರು.

‘ವರಾಹರೂಪಂ’ ನೃತ್ಯರೂಪಕ ಮನಸೂರೆಗೊಂಡಿತು
ಸಮ್ಮೇಳನದ ಎರಡನೇ ದಿನದ ಮತ್ತೊಂದು ಪ್ರಮುಖ ಆಕರ್ಷಣೆಯಾಗಿದ್ದ “ವರಾಹರೂಪಂ” ನೃತ್ಯರೂಪಕವು ಸಭಿಕರನ್ನು ಪೌರಾಣಿಕ ಭಾವಲೋಕಕ್ಕೆ ಕರೆದೊಯ್ದಿತು.

ನೂಪುರ ಸ್ಕೂಲ್ ಆಫ್ ಡ್ಯಾನ್ಸ್ ನ ಜೂಲಿಯಾ ಜಾಯ್ ಅವರ ನಿರ್ದೇಶನದಲ್ಲಿ ಮೂಡಿಬಂದ ಈ ನೃತ್ಯ ಪ್ರದರ್ಶನದಲ್ಲಿ ಶ್ರೀ ಮಹಾವಿಷ್ಣುವಿನ ವರಾಹಾವತಾರವನ್ನು ಭಾವಪೂರ್ಣವಾಗಿ ಅನಾವರಣಗೊಳಿಸಲಾಯಿತು. ಮನೋಜ್ಞ ನೃತ್ಯ ಸಂಯೋಜನೆ, ಸಂಗೀತ, ಭಾವಾಭಿನಯ ಹಾಗೂ ವೇಷಭೂಷಣಗಳು ಕಾರ್ಯಕ್ರಮಕ್ಕೆ ವಿಶೇಷ ಮೆರುಗು ನೀಡಿದವು.

ಈ ನೃತ್ಯರೂಪಕದಲ್ಲಿ ಜೂಲಿಯಾ ಜಾಯ್, ಸೌಮ್ಯ ಮ್ಯಾಥ್ಯೂ, ಆನ್ ಮೇರಿ ಥಾಮಸ್, ಧನ್ಯಾ ಸೈಜಾಯ್, ಪ್ರವಿತಾ ಕಿಣಿ, ಸುನಿತಾ ವಿನುಕೃಷ್ಣನ್, ನಿಶ್ಚಿತಾ ಶೆಟ್ಟಿ, ನಿಯಾ ಪರಾಥಟ್ಟೇಲ್ ಹಾಗೂ ಅಶ್ವಿನ್ ರಾರಾಥೋಡಿ ತಮ್ಮ ಅದ್ಭುತ ನೃತ್ಯ ಪ್ರದರ್ಶನದ ಮೂಲಕ ಸಭಿಕರ ಮನಗೆದ್ದರು.

ಮಕ್ಕಳು ಮತ್ತು ಯುವಜನರ ಪ್ರತಿಭೆಗೆ ಪ್ರೋತ್ಸಾಹ
ಎರಡನೇ ದಿನವೂ ಮಕ್ಕಳ ಹಾಗೂ ಯುವಜನರ ಪಾಲ್ಗೊಳ್ಳುವಿಕೆ ಗಮನಾರ್ಹವಾಗಿತ್ತು. ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳು, ನೃತ್ಯ ಪ್ರದರ್ಶನಗಳು ಹಾಗೂ ವೇದಿಕೆ ಕಾರ್ಯಕ್ರಮಗಳಲ್ಲಿ ಯುವ ಪ್ರತಿಭೆಗಳು ತಮ್ಮ ಸಾಮರ್ಥ್ಯವನ್ನು ಪ್ರದರ್ಶಿಸಿದವು. ಅಮೇರಿಕದಲ್ಲಿ ಬೆಳೆದ ಹೊಸ ತಲೆಮಾರಿನ ಮಕ್ಕಳು ಬಸವ ಸಂಸ್ಕೃತಿ, ಕನ್ನಡ ಭಾಷೆ ಮತ್ತು ಪರಂಪರೆಯೊಂದಿಗೆ ನಂಟು ಬೆಳೆಸಿಕೊಳ್ಳುತ್ತಿರುವುದು ಕಾರ್ಯಕ್ರಮಗಳಲ್ಲಿ ಸ್ಪಷ್ಟವಾಗಿ ಗೋಚರಿಸಿತು.

ಆತಿಥ್ಯ ಮತ್ತು ಸ್ವಯಂಸೇವಕರ ಸೇವೆಗೆ ವ್ಯಾಪಕ ಪ್ರಶಂಸೆ
ಕಾರ್ಯಕ್ರಮಗಳಷ್ಟೇ ಅಲ್ಲ, ಉತ್ತರ ಕೆರೊಲಿನಾ ಘಟಕದ ಆತಿಥ್ಯವೂ ಎರಡನೇ ದಿನದ ಪ್ರಮುಖ ವಿಶೇಷತೆಯಾಗಿತ್ತು. ನೋಂದಣಿ ಕೇಂದ್ರದಿಂದ ಆರಂಭಿಸಿ ಆಹಾರ ವ್ಯವಸ್ಥೆ, ಸಾರಿಗೆ, ವೇದಿಕೆ ನಿರ್ವಹಣೆ, ಧ್ವನಿ ಮತ್ತು ಬೆಳಕಿನ ವ್ಯವಸ್ಥೆ, ಛಾಯಾಗ್ರಹಣ, ವಿಡಿಯೋಗ್ರಫಿ, ಮಕ್ಕಳ ಕಾರ್ಯಕ್ರಮಗಳು ಹಾಗೂ ಅತಿಥಿಗಳ ಮಾರ್ಗದರ್ಶನದವರೆಗೆ ಪ್ರತಿಯೊಂದು ವಿಭಾಗದಲ್ಲೂ ಸ್ವಯಂಸೇವಕರು ಸಮರ್ಪಣೆಯಿಂದ ಕಾರ್ಯನಿರ್ವಹಿಸಿದರು.

ದಿನವಿಡೀ ಕಾಫಿ, ಪಾನೀಯಗಳು, ಮಜ್ಜಿಗೆ, ಊಟ ಹಾಗೂ ಉಪಾಹಾರದ ವ್ಯವಸ್ಥೆಯನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ್ದರಿಂದ ಸಭಿಕರು ಯಾವುದೇ ತೊಂದರೆ ಅನುಭವಿಸಲಿಲ್ಲ. ಅನೇಕರು ಉತ್ತರ ಕೆರೊಲಿನಾ ಘಟಕದ ಆತಿಥ್ಯವನ್ನು ವಿಶೇಷವಾಗಿ ಶ್ಲಾಘಿಸಿದರು.

ಸಮಯಪಾಲನೆ ಸಂಘಟನೆಯ ವಿಶೇಷತೆ
ಬೆಳಗ್ಗೆ 7 ಗಂಟೆಯಿಂದ ಆರಂಭವಾದ ಕಾರ್ಯಕ್ರಮಗಳು ರಾತ್ರಿ 11.30ರವರೆಗೆ ನಿರಂತರವಾಗಿ ನಡೆದರೂ ಯಾವುದೇ ಪ್ರಮುಖ ಕಾರ್ಯಕ್ರಮ ವಿಳಂಬವಾಗದೆ ಸುಗಮವಾಗಿ ಸಾಗಿದ್ದು ಸಂಘಟಕರ ಕಾರ್ಯಕ್ಷಮತೆಯನ್ನು ಪ್ರತಿಬಿಂಬಿಸಿತು. ಕಾರ್ಯಕ್ರಮಗಳ ನಡುವಿನ ಬದಲಾವಣೆ, ವೇದಿಕೆ ಸಿದ್ಧತೆ ಹಾಗೂ ಕಲಾವಿದರ ಸಮನ್ವಯ ಎಲ್ಲವೂ ಅತ್ಯಂತ ಅಚ್ಚುಕಟ್ಟಾಗಿ ನಡೆದವು.

ಅನುರಾಧ ಭಟ್ ಸಂಗೀತ ರಸದೌತಣ
ಎರಡನೇ ದಿನದ ಸಮಾರೋಪಕ್ಕೂ ಮುನ್ನ ನಡೆದ ಪ್ರೈಮ್ ಟೈಮ್ ಸಂಗೀತ ಕಾರ್ಯಕ್ರಮ ಸಭಿಕರನ್ನು ರಸದೌತಣದಲ್ಲಿ ತೇಲಿಸಿತು.ಖ್ಯಾತ ಹಿನ್ನೆಲೆ ಗಾಯಕಿ ಅನುರಾಧಾ ಭಟ್ ತಮ್ಮ ಸುಮಧುರ ಕಂಠದ ಮೂಲಕ ಕನ್ನಡದ ಜನಪ್ರಿಯ ಚಿತ್ರಗೀತೆಗಳು, ಭಕ್ತಿಗೀತೆಗಳು ಹಾಗೂ ಮೆಲೋಡಿ ಹಾಡುಗಳನ್ನು ಹಾಡಿ ಸಭಾಂಗಣವನ್ನು ಸಂಗೀತಮಯಗೊಳಿಸಿದರು. 16 ಭಾಷೆಗಳಲ್ಲಿ 5,000ಕ್ಕೂ ಹೆಚ್ಚು ಹಾಡುಗಳನ್ನು ಹಾಡಿರುವ ಅವರು ಪ್ರತಿಯೊಂದು ಹಾಡಿನ ಮೂಲಕ ಸಭಿಕರನ್ನು ರಂಜಿಸಿದರು.

ಈ ಸಂಗೀತ ಕಾರ್ಯಕ್ರಮಕ್ಕೆ ಖ್ಯಾತ ಡ್ರಮ್ಮರ್ ಕೃಷ್ಣ ಅವರ ಅದ್ಭುತ ಡ್ರಮ್ಮಿಂಗ್ ವಿಶೇಷ ಮೆರುಗು ನೀಡಿತು. ಅನುರಾಧಾ ಭಟ್ ಅವರ ಗಾಯನ ಮತ್ತು ಕೃಷ್ಣ ಅವರ ಡ್ರಮ್ಮಿಂಗ್ ಸಂಯೋಜನೆ ಸಭಿಕರನ್ನು ಕೊನೆಯ ಕ್ಷಣದವರೆಗೂ ಹಿಡಿದಿಟ್ಟುಕೊಂಡಿತು. ರಾತ್ರಿ 11.30ರವರೆಗೆ ನಡೆದ ಈ ಸಂಗೀತ ಕಾರ್ಯಕ್ರಮದೊಂದಿಗೆ ಎರಡನೇ ದಿನದ ಕಾರ್ಯಕ್ರಮಗಳು ಯಶಸ್ವಿಯಾಗಿ ಮುಕ್ತಾಯಗೊಂಡವು.

ಬಸವ ತತ್ವವನ್ನು ಬದುಕಿನಲ್ಲಿ ಅಳವಡಿಸಿದ ಮಹಾಸಮ್ಮೇಳನ
48ನೇ VSNA ಮಹಾಸಮ್ಮೇಳನದ ಎರಡನೇ ದಿನ ಕೇವಲ ಸಾಂಸ್ಕೃತಿಕ ಕಾರ್ಯಕ್ರಮಗಳ ಸಮೂಹವಾಗಿರಲಿಲ್ಲ. ಬಸವಣ್ಣನವರ ಕಾಯಕ, ದಾಸೋಹ, ಸಮಾನತೆ ಮತ್ತು ಮಾನವೀಯತೆ ಎಂಬ ತತ್ವಗಳನ್ನು ಬದುಕಿನಲ್ಲಿ ಅಳವಡಿಸಿಕೊಳ್ಳುವ ಸಂದೇಶವನ್ನು ವಿವಿಧ ಕಾರ್ಯಕ್ರಮಗಳ ಮೂಲಕ ಪರಿಣಾಮಕಾರಿಯಾಗಿ ಸಾರಿತು.

ಎರಡು ದಿನಗಳ ಮಹಾಸಮ್ಮೇಳನದಲ್ಲಿ ಧಾರ್ಮಿಕ ಆಚರಣೆಗಳು, ಚಿಂತನಾತ್ಮಕ ಕಾರ್ಯಕ್ರಮಗಳು, ನಾಟಕಗಳು, ನೃತ್ಯಗಳು, ಸಂಗೀತ, ಮಕ್ಕಳ ಮತ್ತು ಯುವಜನರ ಪಾಲ್ಗೊಳ್ಳುವಿಕೆ ಹಾಗೂ ನೂರಾರು ಸ್ವಯಂಸೇವಕರ ನಿಸ್ವಾರ್ಥ ಸೇವೆ ಎಲ್ಲರ ಮನದಲ್ಲಿ ಅಚ್ಚಳಿಯದ ನೆನಪು ಮೂಡಿಸಿತು.

ಉತ್ತರ ಕೆರೊಲಿನಾ ಘಟಕದ ಆತ್ಮೀಯ ಆತಿಥ್ಯ, ಶಿಸ್ತುಬದ್ಧ ಆಯೋಜನೆ ಮತ್ತು ನೂರಾರು ಸ್ವಯಂಸೇವಕರ ತಂಡದ ಕಾರ್ಯಕ್ಷಮತೆ 48ನೇ VSNA ಮಹಾಸಮ್ಮೇಳನವನ್ನು ಉತ್ತರ ಅಮೇರಿಕದ ವೀರಶೈವ-ಲಿಂಗಾಯತ ಸಮುದಾಯದ ಮತ್ತೊಂದು ಸ್ಮರಣೀಯ ಅಧ್ಯಾಯವನ್ನಾಗಿ ರೂಪಿಸಿತು.

VSNA ಬ್ಯುಸಿನೆಸ್ ಫೋರಂ ಉದ್ಯಮಿಗಳಿಗೆ ಪ್ರೇರಣೆ
ಮಹಾಸಮ್ಮೇಳನದ ಎರಡನೇ ದಿನ ನಡೆದ VSNA ಬ್ಯುಸಿನೆಸ್ ಫೋರಂ ಉದ್ಯಮಿಗಳು, ವೃತ್ತಿಪರರು ಹಾಗೂ ಯುವಜನರ ಗಮನ ಸೆಳೆಯಿತು. ಮಹಾಸಮ್ಮೇಳನದ ಅಧ್ಯಕ್ಷ ವಸಂತ್ ಕಲಾಲೆ ಅವರ ನೇತೃತ್ವದಲ್ಲಿ ನಡೆದ ಈ ಬಿಸಿನೆಸ್ ಫೋರಮ್ ನಲ್ಲಿ ಹಲವಾರು ಉದ್ಯಮಿಗಳು ಮತ್ತು ಪರಿಣಿತರು ಉದ್ಯಮಶೀಲತೆ, ಹೂಡಿಕೆ, ನಾಯಕತ್ವ, ನೆಟ್‌ವರ್ಕಿಂಗ್ ಹಾಗೂ ಸಮಾಜಕ್ಕೆ ಕೊಡುಗೆ ನೀಡುವ ಮಹತ್ವದ ಕುರಿತು ಉಪಯುಕ್ತ ಮಾಹಿತಿಯನ್ನು ಹಂಚಿಕೊಂಡರು.

“Learn the Rules, Break the Rules, Contribute” ಎಂಬ ಸಂದೇಶದ ಮೂಲಕ ಯಶಸ್ಸಿನ ಜೊತೆಗೆ ಸಮಾಜಕ್ಕೆ ಮರಳಿ ಕೊಡುವ ಮನೋಭಾವ ಬೆಳೆಸಿಕೊಳ್ಳಬೇಕೆಂದು ವಸಂತ್ ಕಲಾಲೆ ಕರೆ ನೀಡಿದರು. ಬಸವಣ್ಣನವರ ಅನುಭವ ಮಂಟಪ ಪರಿಕಲ್ಪನೆಯಂತೆ ಅನುಭವ ಹಂಚಿಕೆ, ಪರಸ್ಪರ ಕಲಿಕೆ ಹಾಗೂ ಮುಂದಿನ ತಲೆಮಾರಿನ ಉದ್ಯಮಿಗಳನ್ನು ಬೆಳೆಸುವ ಉದ್ದೇಶದಿಂದ ಆಯೋಜಿಸಿದ್ದ ಈ ಫೋರಂ ಸಭಿಕರಿಂದ ಉತ್ತಮ ಮೆಚ್ಚುಗೆ ಪಡೆಯಿತು.

ಅಮೇರಿಕ ಹಾಗೂ ಕೆನಡಾ ರಾಷ್ಟ್ರೋತ್ಸವಕ್ಕೆ ಗೌರವ
ಜುಲೈ 4ರಂದು ಅಮೇರಿಕ ದ 250ನೇ ಸ್ವಾತಂತ್ರ್ಯೋತ್ಸವವನ್ನು ಮಹಾಸಮ್ಮೇಳನದಲ್ಲಿ ವಿಶೇಷವಾಗಿ ಆಚರಿಸಲಾಯಿತು. ಸಭಾಂಗಣದಲ್ಲಿದ್ದ ನೂರಾರು ಸಭಿಕರು ಎದ್ದು ನಿಂತು ಅಮೇರಿಕದ ರಾಷ್ಟ್ರಗೀತೆ ಹಾಡುವ ಮೂಲಕ ತಮ್ಮ ನೆಲೆಸಿರುವ ದೇಶಕ್ಕೆ ಗೌರವ ಸಲ್ಲಿಸಿದರು.

ಇದೇ ಸಂದರ್ಭದಲ್ಲಿ ಜುಲೈ 1ರಂದು ರಾಷ್ಟ್ರೀಯ ದಿನವನ್ನು ಆಚರಿಸಿಕೊಂಡಿದ್ದ ಕೆನಡಾ ದೇಶಕ್ಕೂ ಗೌರವ ಸೂಚಿಸಿ ಕೆನಡಾದ ರಾಷ್ಟ್ರಗೀತೆಯನ್ನು ಸಹ ಎಲ್ಲರೂ ಎದ್ದು ನಿಂತು ಹಾಡಿದರು. ಬಳಿಕ ಭಾರತ ಮಾತೆಯ ಮೇಲಿನ ಅಭಿಮಾನವನ್ನು ವ್ಯಕ್ತಪಡಿಸುತ್ತಾ “ಜನ ಗಣ ಮನ” ರಾಷ್ಟ್ರಗೀತೆಯನ್ನು ಸಹ ಎಲ್ಲರೂ ಒಕ್ಕೊರಲಿನಿಂದ ಹಾಡಿದರು.

ಅಮೇರಿಕ , ಕೆನಡಾ ಮತ್ತು ಭಾರತದ ರಾಷ್ಟ್ರಗೀತೆಗಳು ಒಂದೇ ವೇದಿಕೆಯಲ್ಲಿ ಮೊಳಗಿದ ಈ ಅಪರೂಪದ ಕ್ಷಣವು, ತಮ್ಮ ತಾಯ್ನಾಡಿನ ಸಂಸ್ಕೃತಿಯನ್ನು ಉಳಿಸಿಕೊಂಡಿರುವ ಉತ್ತರ ಅಮೆರಿಕಾದ ವೀರಶೈವ-ಲಿಂಗಾಯತ ಸಮುದಾಯವು ತಾವು ವಾಸಿಸುವ ದೇಶಗಳಿಗೂ ಸಲ್ಲಿಸುವ ಗೌರವದ ಸುಂದರ ಸಂಕೇತವಾಗಿ ಮೂಡಿಬಂತು.